ՀՍՀ/ԾԱՆՐՈՒԹՅԱՆ ԿԵՆՏՐՈՆ

ԾԱՆՐՈՒԹՅԱՆ ԿԵՆՏՐՈՆ, երկրաչափական կետ, որով անցնում է մարմնի բոլոր մասնիկների ծանրության ուժերի համազորը՝ տարածության մեջ մարմնի ցանկացած դիրքում: Սիմետրիայի կենտրոն ունեցող համասեռ մարմնի Ծ. կ. համընկնում է այդ կենտրոնի հետ: Ընդհանուր դեպքում, երբ մարմինը հնարավոր է բաժանել առանձին մասերի, Ծ. կ-ի կոորդինատները որոշվում են որոշվում են՝ $x_c=\frac{\sum _{i=1}^n{p}_i{x}_i}{\sum _{i=1}^n{p}_i},y_c=\frac{\sum _{i=1}^n{p}_i{y}_i}{\sum _{i=1}^n{p}_i},z_c=\frac{\sum _{i=1}^n{p}_i{z}_i}{\sum _{i=1}^n{p}_i}$ որտեղ pi-երը մարմնի մասերի ծանրության ուժերն են, իսկ (хi, уi, zi) երը՝ այդ մասերի Ծ. կ-ների կոորդինատները։ Ծ. կ. և իներցիայի կենտրոն հասկացություններն իրարից տարբերվում են նրանով, որ Ծ. կ. իմաստ ունի միայն համասեռ ձգողության դաշտում գտնվող մարմինների համար: Իներցիայի կենտրոն հասկացությունը կապված չէ ուժային դաշտ հասկացության հետ և այս իմաստով ավելի ընդհանուր է: Ծանրության համասեռ ուժային դաշտում գտնվող մարմնի Ծ. կ. և իներցիայի կենտրոնը համընկնում են: