ՀՍՀ/ՀԱՄԵՄԱՏՈՒԹՅՈՒՆ ՄԱԹԵՄԱՏԻԿԱ

ՀԱՄԵՄԱՏՈՒԹՅՈՒՆ, a, b, c, d մեծություններից կազմված երկու հարաբերությունների հավասարություն՝ $\frac{a}{b}=\frac{c}{d}$ կամ a:b=c:d (1): a, b, c, d մեծությունները կոչվում են Հ-յան անդամներ, ընդ որում a-ն և d-ն՝ ծայր ա ն դ ա մ ն ե ր, b-ն և c-ն՝ միջին անդամներ: Հ-յան հիմնական հատկությունը ծայրանդամների և միջին անդամների արտադրյալների հավասարությունն է՝ ad=bc: Սա անհրաժեշտ և բավարար պայման է, որպեսզի a, b, c, d մեծությունները կազմեն Հ.: Հ-յան յուրաքանչյուր անդամ կարելի է արտահայտել մյուս երեքով, օրինակ՝ $d=\frac{bc}{a}$: Հ-յան անդամների տեղափոխությամբ կամ նույնական պարզ ձևափոխությամբ ստացվում են մի քանի նոր Հ-ներ՝ $\frac{b}{a}=\frac{d}{c}$, $\frac{a}{c}=\frac{b}{d}$, $\frac{d}{b}=\frac{c}{a}$ ևն, որոնք կոչվում են (1)-ի ածանցյալ Հ-ներ: