ՀՍՀ/ՀԱՎԱՍԱՐԱԿՇՌՈՒԹՅՈՒՆ

ՀԱՎԱՍԱՐԱԿՇՌՈՒԹՅՈՒՆ մեխանիկական համակարգի, մեխանիկական համակարգի վիճակ, որի դեպքում համակարգի բոլոր կետերը հաշվարկման տվյալ համակարգի նկատմամբ անշարժ են: Եթե հաշվարկման համակարգը իներցիալ է, ապա Հ. կոչվում է բացարձակ, հակառակ դեպքում` հարաբերական: Համակարգի Հ–յան համար նրա վրա ազդող ուժերը պետք է բավարարեն ստատիկայում դիտարկվող որոշակի պայմանների: Օրինակ, ազատ պինդ մարմնի բացարձակ Հ–յան համար անհրաժեշտ է, որ կոորդինատային երեք առանցքներից յուրաքանչյուրի վրա մարմնի վրա կիրառված բոլոր ուժերի պրոյեկցիաների գումարները և այդ առանցքների նկատմամբ դրանց մոմենտների գումարները հավասար լինեն զրոյի`

$\mathrm{\Sigma }{F}_{kx}=0$, $\mathrm{\Sigma }{F}_{ky}=0$, $\mathrm{\Sigma }{F}_{kz}=0$; $\mathrm{\Sigma }{m}_x(F_k)=0$, $\mathrm{\Sigma }{m}_y(F_k)=0$, $\mathrm{\Sigma }{m}_z(F_k)=0$: